Pistlar

Taktu þátt

Í dag verður skorið úr um hvaða einstaklingar skipa lista sjálfstæðismanna í kosningum til borgarstjórnar í vor. Það er afar mikilvægt að sem flestir sjálfstæðismenn taki þátt í prófkjörinu og stilli upp sterkum lista fyrir vorið. Sjálfstæðisflokkurinn er í sérflokki stjórnmálaflokka á Íslandi hvað þátttöku varðar. Rúmlega 20.000 einstaklingar eru skráðir í flokkinn í Reykjavík. Þetta eru miklu fleiri en hjá flokkum sem oft vilja bera sig saman við Sjálfstæðisflokkinn að stærð.

Erfiðara en oft áður er að ná eyrum þessa mikla fjölda vegna háværrar landsmálaumræðu. Fréttir af stöðu ríkissjóðs, fyrirtækja og heimila í landinu ásamt umræðu um Icesave hafa skiljanlega tekið völdin. Borgarbúar vita að ný vinnubrögð samráðs og samvinnu eru forsenda þess að borginni verði áfram stýrt af festu í því erfiða árferði sem við blasir. Þrætur og ræðukeppnir í fjölmiðlum skila engu þegar máli skiptir að hugsa skýrt og forgangsraða verkefnum. Stjórnmálaflokkar í Reykjavík hafa ólíka sýn á hvaða leiðir skila mestu í þeirri stöðu sem upp er komin. Nærtækt er að benda á leiðir ríkisstjórnarinnar sem treystir á skattahækkanir sem lausn vandans. Vinstri grænir í borgarstjórn hafa lagt til sömu leið fyrir hönd borgarbúa.

Sjálfstæðismenn í borginni vilja takast á við núverandi ástand með ráðdeild í rekstri og forgangsröðun. Þannig ætlum við að verja skóla- og velferðarmál sem eru þeir málaflokkar sem mest ríður á að verja þegar herðir að. Þessu verður að ná án skattahækkana sem myndu gera annars erfiða stöðu ómögulega fyrir heimilin í borginni.

Það skiptir því máli hverjir veljast til forustu í borgarmálum í vor. Sjálfstæðismenn eiga að taka þátt í prófkjörinu í dag og kjósa þá frambjóðendur sem þeir treysta best til að fylgja eftir áherslum okkar í borginni. Með því kjósa þeir með breyttum vinnubrögðum, áherslu á að verja skóla- og velferðarmál og á móti skattahækkunum.